AJDODLAR MЕROSINI TADQIQ ETUVCHI NOYOB PLATFORMA

AJDODLAR MЕROSINI TADQIQ ETUVCHI NOYOB PLATFORMA

XALQARO KONFЕRЕNSIYA

Nufuzli xalqaro konferensiyada Oʻzbekistonda kechayotgan diniy-maʼrifiy islohotlar buyuk allomalar ilmiy merosini yanada keng oʻrganish imkoniyatini oshirayotgani eʼtirof etildi.

Samarqandda 15 iyul kuni “Sahih ul-Buxoriy” asarining jahon kutubxonalarida saqlanayotgan qadimiy va nodir qoʻlyozma nusxalari” mavzuida xalqaro konferensiya boʻlib oʻtdi. Tadbir Vazirlar Mahkamasi huzuridagi Imom Buxoriy xalqaro ilmiy-tadqiqot markazi tomonidan Islom hamkorlik tashkilotining Taʼlim, fan va madaniyat masalalari boʻyicha xalqaro tashkiloti, Islom tarixi, sanʼati va madaniyatini tadqiq etish mar­kazi bilan hamkorlikda tashkil etildi.

Anjuman ishtirokchilari mamlakatimizda buyuk muhaddis Imom Buxoriy va boshqa mutafakkir allomalar qoldirgan boy maʼnaviy xazinani asrab-avaylash va kelgusi avlodlarga toʻla-toʻkis yetkazish borasida amalga oshirilayotgan ishlarga yuksak baho berdilar.

Dunyoviy ilmlarning koʻhna beshigi

Avvalo, konferensiya islom olamining buyuk siymosi, muhaddislar sultoni Imom Buxoriy tavallud topgan sana arafasida tashkil etilishining oʻziga xos ramziy maʼnosi bor. Chunki yangi Oʻzbekistonga koʻhna moziy sarhadlaridan ziyo taratib, abadiy yashayotgan bu ulugʻ zot kabi buyuk allomalari bilan chin maʼnoda faxr etish yarashadi. Holbuki, asosiy qismi hozirgi Oʻzbekiston hududiga toʻgʻri keladigan qadimgi Movarounnahr nafaqat islomiy, balki dunyoviy ilmlarning ham haqiqiy beshigi boʻlgan.

Konferensiyada 10 dan ziyod xalqaro tashkilot va xorijiy davlatning 40 ga yaqin taniqli ilohiyotchi olimi va mamlakatimizning yetakchi islomshunos mutaxassislari qatnashgani xalqaro va mahalliy ekspertlar hamjamiyatining anjuman mavzusiga boʻlgan katta qiziqishidan dalolat beradi. Konferensiya ishini ekspertlar, mustaqil tadqiqotchilar va tinglovchilar jami 106 nuqtadan turib kuzatib borgani fikrimizni isbotlaydi.

Ishtirokchilar fikricha, Oʻzbekistonda diniy-maʼrifiy yoʻnalishdagi islohotlar salmoq jihatidan yetakchi oʻrinlarni egallamoqda. Bu esa, ulugʻ ajdodlarimizning siyrati, ularning oʻlmas asarlari va chuqur ilmiy gʻoyalarini yanada izchil oʻrganish, mufassal tadqiq va keng targʻib etish masʼuliyatini yuklaydi.

Konferensiya ochilishida Taʼlim, fan va madaniyat masalalari boʻyicha Islom tashkiloti (ICESCO) Bosh direktori Salim Muhammad al-Malik ham soʻzga chiqib, Movarounnahrdan koʻplab allomalar yetishib chiqqani, ular nafaqat islom, bal­ki butun bashariyat sivilizatsiyasiga ulkan hissa qoʻshganini taʼkidladi. Notiq “Sahih ul-Buxoriy” haqida soʻzlar ekan, uning dunyoda eng koʻp sharh yozilgan asar ekanini, bugungi kunda ham nufuzli oʻquv dargohlarida akademik tadqiqotlarning bosh mavzusi boʻlib qolayotganini taʼkidladi.

Xalqaro anjuman yalpi majlisida, shuningdek, Imom Buxoriy shaxsining komillik nuqtai nazaridan yuksak darajasi ham alohida qayd etildi.

Jumladan, Islom hamkorlik tashkilotining Islom tarixi, sanʼati va madaniyatini tadqiq etish markazi (IRCICA) Bosh direktori Mahmud Erol Kilich: “Islom ilmlari rivojida asosiy oʻrin tutgan aplomalarni haqli ravishda yetuk siymolar sirasida koʻramiz. Umrini shunday sharafli ishga bagʻishlagan Imom Buxoriyning hayot yoʻli va mashaqqatli ijodi, uning xizmatlari tufayli erishilgan yangi bilimlar mohiyatini jahon boʻylab kengroq taratishni ota yurtimiz — Oʻzbekistondagi hamkasblarimiz ishtirokisiz amalga oshirishni imkonsiz deb bilamiz”, dedi.

Ilmu maʼrifatda yetuk sivilizatsiya markazi

Misrning Al-Azhar islom tadqiqotlari majmuasi Bosh kotibi Muhammad Nazir Ayyad yalpi majlis muhokamalariga yakun yasab, Movarounnahr mutafakkirlarining ulkan xizmatlari samarasi oʻlaroq, bu qutlugʻ zamin faqat jugʻrofiy nom emas, ilmu maʼrifatda yetuklikka erishgan alohida bir sivilizatsiya makoni sifatida ham shuhrat qozonganini taʼkidladi. Uning taʼkidlashicha, yurtimizdan yetishib chiqqan olimlar islomiy va dunyoviy ilmlarni boshqacha nazar va oʻzgacha yondashuv bilan oʻrganib, olamshumul natijalarga erishgan. Insoniyat bugungi kunda ham ana shu ilmlarga ehtiyoj sezmoqda.

Yalpi majlis yakunida “Sahih ul-Buxoriy” asarining jahon kutubxonalarida saqlanayotgan qadimiy va nodir qoʻlyozma nusxalari” deb nomlangan taqdimot namoyish etildi.

Shundan soʻng konferensiya oʻz ishini 3 ta shoʻbaga boʻlingan holda davom ettirdi. “Sahih ul-Buxoriy” asarining jahon kutubxonalarida saqlanayotgan qadimiy va nodir qoʻlyozma nusxalari”, “Imom Buxoriy ilmiy merosi va hozirgi zamon”, “Movarounnahr ulamolarining islom sivilizatsiyasi rivojiga qoʻshgan hissasi” shoʻbalarida alloma hayoti va ilmiy-maʼnaviy merosiga doir jami 55 ta ilmiy maʼruza tinglandi.

Ibratli hayot tarzi taqvoning oliy namunasidir

Birinchi xulosa. Oʻzbekiston diyorini islom ilmlari markazi sifatida eʼtirof etish oʻrinlidir. Islom dunyosida umumeʼtirof etilgan ayni bir haqiqat — eng ishonchli hisoblangan olti mashhur hadis toʻplamidan toʻrttasi Movarounnahr allomalari tomonidan jamlangani buning yaqqol dalili. Imom Buxoriy esa, ushbu allomalarning eng ulugʻi — muhaddislar sultoni eʼtirofidagi yagona zot.

Mazkur fikrni Misrning Al-Azhar islom tadqiqotlari majmuasi Bosh kotibi Muhammad Nazir Ayyad yakdillik bilan tasdiqladi: “Imom Buxoriy butun dunyo ulamolarining hurmat va ehtiromiga sazovor boʻlgan ulugʻ zotdir. Allomaning 16 yil davomida Paygʻambarimiz alayhissalom sunnatlariga doir eng ishonchli hadislarni jamlash uchun ilm yoʻlida chekkan zahmati bir necha oʻn kishining hayotiga tatiydi. Uning shaxsiyati, ibratli hayot tarzi taqvoning oliy namunasidir”.

Turkiyaning Anqara Yildirim Boyazid universi­teta professori Farhat Goʻkche yuqoridagi fikrni davom ettirib: “Menga berilgan imkoniyatdan foydalanib, muhaddislar imomi Muhammad ibn Ismoil Buxoriy hazratlarining xulqu maqomatlariga ikki ogʻiz toʻxtalib oʻtsam. Ul zotning hayotini oʻrganar ekanmiz, goʻzal xulqi, kamtarligi va tavozesi barchamizda uning ilmiy merosi bilan bir qatorda, shaxsiyatiga ham cheksiz hurmat-ehtirom uygʻotadi”, deya toʻlqinlanib gapirdi.

Al-Azhar islom tadqiqotlari majmuasi kotibiyati mudiri Muhammad Vardaniy konferensiyaning birinchi xulosasiga yakun yasadi: “Alloma oʻz asarlarini yuksak darajada masʼuliyat, roviylarga hech bir muhaddis qoʻymagan qatʼiy talablar bilan yondashib yozganini zamondoshlari takror-takror qayd etgan. Shu sababli hech bir hadisshunos Imom Buxoriyning martabasiga erisha olmagan”.

Darhaqiqat, islom tarixiga nazar solsak, musulmon ummati Muhammad alayhissalomning muborak hayoti va islom taʼlimotini sinchkovlik bilan oʻrgangan. Ular orasida muhaddislar sultoni — Imom Buxoriyning tutgan oʻrni beqiyosdir. Uning “Sahih ul-Buxoriy” toʻplami diniy ahkomlar va axloqiy koʻrsatmalarning asosiy manbai sifatida tan olingan. Aynan shu eʼtirof konferensiya ishtirokchilarining ikkinchi xulosasiga yoʻl ochdi.

Ikkinchi xulosa. Imom Buxoriyning maʼnaviy merosi, xususan, “Sahih ul-Buxoriy” asari islom dinining asl mohiyatini, insonparvarlik va bagʻrikenglik gʻoyalarini oʻzida aks ettirgan muhim manbadir.

Haqiqatan ham, muhaddislikda “sahih” yoʻnalishi asoschisi hisoblanmish Imom Buxoriy minglab islom ulamolaridan 600 mingdan ortiq hadis toʻplab, ular orasidan 7275 ta eng ishonchlisini saralab olib, “Al-Jome as-sahih” kitobiga kiritgan. Mazkur asar hadis toʻplamlari orasida eng ishonarli va mukammalidir.

Koʻplab muammolarga yechim topadigan noyob manba

Malayziyaning Islomni anglash instituti ilmiy xodimi Muhammad Mustaqim Malikning soʻzlariga koʻra, “Sahih ul-Buxoriy”ning moʻtabarligi shundaki, ushbu asar uzoq oʻtmishda yozilgan manba boʻlishiga qaramay, undan insoniyat bugungi kunda duch kelayotgan koʻplab muammolarga ham yechim topishi mumkin. Xususan, COVID-19 pandemiyasi tarqalishining oldini olishda zamonaviy tibbiyot qoʻllayotgan — “epi­demiya oʻchoqlariga borishdan saqlanish, ijtimoiy masofani saqlash, kasallanganlarni alohidalash” kabi choralar Paygʻambarimiz alayhissalom tomonidan tavsiya etilganini koʻrish mumkin. Imom Buxoriy buni oʻz asariga kiritish chogʻida kelajak avlodlarni oʻylagan boʻlishi ehtimoldan xoli emas”.

Notiqning bu soʻzlari asarning bugungi kun uchun ham dolzarb qiymati, ayniqsa, butun jahon koronavirus nomli koʻrinmas yov bilan kurashayotgan ayni paytdagi yuksak ahamiyatini ham tasdiqlaydi.

Mohiyat jihatidan “Al-Jome as-sahih” toʻplami chin maʼnoda Qurʼoni karimdan keyin islom dinining ikkinchi muqaddas manbai hisoblanadi. Hadis keltirib, uning manbasi sifatida Imom Buxoriy koʻrsatiladigan boʻlsa, uning ishonchliligi xususida hech bir shubha qolmaydi.

— Imom Buxoriy 600 ming hadis orasidan eng sahihlarini saralab, ularni illatlilardan xalos etgan. Soddaroq aytadigan boʻlsak, buyuk muhaddis hadislarni “davolagan”, — deydi Turkiyaning Ibn Xaldun universiteti professori Muhyiddin Avvoma.

Umumiy jihatdan islomni anglashning ikki asosiy usuli mavjud boʻlib, ulardan asosiysi Qurʼonni oʻqish va oʻrganishdir. Imom Buxoriy asari orqali islomni inʼikos etish yana bir usuldir. Chunki unda Paygʻambarimiz alayhissalomning eng ishonchli sunnatlari mujassamdir.

Oʻzbekiston xalqaro islom akademiyasi dotsenti Mahfuza Alimova asarning yuksak qiymati uning oʻquvchi tomonidan nisbatan oson oʻzlashtirilishida ham ekanini alohida qayd etdi: “Oliy isnodli hadislar oʻrganilar ekan, Imom Buxoriy tanlagan usul naqadar mukammalligiga yana bir bor guvoh boʻlamiz. “Sahih ul-Buxoriy” jome uslubida yozilgan boʻlib, roviylar emas, mavzular boʻyicha kitoblar va boblarga ajratilgani uning eng murakkab, taʼbir joiz boʻlsa, akademik tadqiqot ekanini, oʻsha davrgacha misli koʻrilmagan jurʼat va shijoat samarasi boʻlganini namoyon etadi. Mehnati shu qadar ogʻir boʻlgani uchun ham ushbu asar juda qulay va oson oʻqib oʻrganiladi”.

Germaniyalik olimlarni hayratga solgan qoʻlyozmalar

Konferensiyaning ishtirokchi mehmonlari, ayniqsa, mazkur asar qoʻlyozmalari saqlanayotgan mamlakatlar vakillari ulkan tarixiy qiymatga ega nodir xazina aynan ularning vatanida joy egallaganidan faxr tuyishlarini bildirdilar. Germaniyaning Leypsig universiteti professori Stefani Brinkman soʻzlariga eʼtibor bering: “Imom Buxoriy asarlarining XV asrga oid qoʻlyozma nusxalari Germaniyaning Leypsig universitetida saqlanishi biz uchun sharafdir. Bu germaniyalik olimlarni yangi-yangi izlanishlarga undaydi. Oʻrta asrlarga oid ushbu qoʻlyozma asarlarning mukammalligi bizni doimo hayratga soladi”.

Imom Buxoriy ajdodimiz ekani esa, bizga iftixor bagʻishlaydi. Shuning uchun asarni oʻrganish, undagi hadislar va ular mohiyatini yosh avlod ongiga yetkazish, odamlar maʼnaviyatini aynan shu ziynat bilan bezash hammadan ham koʻra biz uchun gʻoyat qadrli va alohida qiymatga ega. Bu esa, konferensiyaning uchinchi xulosasiga asos boʻldi.

Uchinchi xulosa. Oʻzbekistonda milliy va diniy qadriyatlarni rivojlantirish, tinchlikni mustahkamlash, millatlararo totuvlik va diniy bagʻrikenglikni taʼminlash borasida ulkan ishlar amalga oshirilmoqda.

Taassuf bilan aytish kerakki, uzoq yillar mintaqamizda ateizm baland mavqe tutgan siyosiy tuzum hukmronligi davrida muqaddas islom dini va uning namoyandalaridan boʻlmish ulugʻ tarixiy siymo — Imom Buxoriy shaxsiyati va faoliyatiga noxolis baho berildi. Bu oʻsha davrda fan va jamiyatning ijtimoiy tafakkurini boshqarib turgan hukmron mafkura talablaridan biri edi.

Shukrlar boʻlsinki, Alloh taolo bizga ajdodlarimiz nomi va ularning boy maʼnaviy-maʼrifiy, yuksak ilmiy qiymatdagi “Sahih ul-Buxoriy” kabi shoh asarlarini qaytarib berdi. Chunki buyuk ajdodlar merosi, avvalo, uning bevosita avlodlariga tegishlidir. Buning uchun tarixiy asoslar yetarli.

“Tarixdan bilamizki, Oʻrta Osiyoga islom dinining kirib kelishi ummaviylar davriga borib taqaladi. Oʻsha yillardan boshlab, bu sharofatli zaminda islomiy va dunyoviy ilmlar keng koʻlamda rivojlandi. Movarounnahrdan yetishib chiqqan olimlar nafaqat islom dunyosi, balki butun jahon sivilizatsiyasi rivojiga ulkan hissa qoʻshganini alohida taʼkidlashni istardim. Buyuk ajdodlaringiz ilmiy-maʼnaviy merosini oʻrganish, tadqiq etish bugungi kundagi dolzarb vazifalardan biridir”, dedi Malayziya xalqaro islom universiteti professori Muhammad Said.

Xalqimiz asrlar davomida orzu qilgan xayrli amal

Bugungi kunda yangi Oʻzbekiston diniy-maʼrifiy sohada islohotlarni izchil davom ettirib, oʻz fuqarolarining vijdon va eʼtiqod erkinligini toʻla taʼminlaydigan va islomning insonparvarlik va taraqqiyparvarlik mohiyatini baralla tarannum qiladigan mamlakatga aylandi. Yurtimizning bu borada jahon miqyosida oshib borayotgan salohiyati konferensiya ishtirokchilari tomonidan bir ovozdan eʼtirof etilishi bilan birga, hamkorlikda hayotga tatbiq etilishi lozim boʻlgan amaliy takliflar ham bildirildi.

Bir soʻz bilan aytganda, Oʻzbekiston oʻz Prezidenti rahbarligida ijtimoiy-maʼnaviy jabhada milliy anʼanalariga sodiq qolgan holda, ilmni ragʻbatlantirish yoʻlida shahdam odimlamoqda. Biz islom taʼlimotini maʼnaviy qadriyatlarning yaxlit tizimi, mushtarak hayot, xulq-atvor va fikrlash tarzi deb qabul qilamiz hamda shu tarzda oʻz hayotimizga chuqur singdirganmiz. Shuning uchun islom dinining asl mohiyatini tadqiq etish, undagi ezgulikka yoʻgʻrilgan gʻoyalarni asl maʼnosida targʻib qilishga alohida eʼtibor qaratyapmiz. Imom Buxoriy xalqaro ilmiy-tadqiqot markazining tashkil etilishidan koʻzlangan asosiy maqsad ham shu. Bu esa, nihoyat, konferensiyaning oxirgi xulosasini keltirib chiqardi.

Toʻrtinchi xulosa. Imom Buxoriy xalqaro ilmiy-tadqiqot markazi Movarounnahrdan yetishib chiqqan buyuk alloma va mutafakkirlarning hayoti va ilmiy merosini tadqiq etish, mazmun-mohiyatini dunyo jamoatchiligiga yetkazishda oʻziga xos plat­forma boʻlib xizmat qilmoqda.

Markazda, odatda, joʻshqin bahs va munozaralarga boy tarzda oʻtadigan bu kabi muhim va nu­fuzli anjumanlarga davomli ravishda mezbonlik qilish odat tusiga kirgan. Shu sabab ishtirokchilar markaz faoliyati va uning erishayotgan yutuqlari toʻgʻrisida koʻplab maʼlumotga ega boʻldilar.

— Imom Buxoriy xalqaro ilmiy-tadqiqot markazini islomiy ilmiy meros va, umuman, sunnatni muhofaza qilish uchun taʼsis etilgan muassasa deb ham bilaman, — dedi Turkiyaning Marmara universiteti professori Ayshe Shehyar xonim.

Oʻzbekiston xalqaro islom akademiyasi professori Zohidjon Islomov soʻzlariga koʻra, bugungi kunda 33 mamlakatdagi yetmishdan ziyod fondda “Sahih ul-Buxoriy”ning 820 ta qoʻlyozmasi saqlanayotgani aniqlangan. Ularning nusxalarini jamlash, tadqiq etish va keng jamoatchilikka taqdim qilish Imom Buxoriy xalqaro ilmiy-tadqiqot markazi va boshqa shunday muassasalar oldida turgan dolzarb vazifa, xalqimiz asrlar davomida orzu qilib kelgan xayrli amaldir.

Barcha ishtirokchilar tomonidan Imom Buxoriy xalqaro ilmiy-tadqiqot markazi Movarounnahrdan yetishib chiqqan buyuk alloma va mutafakkirlar hayoti va ilmiy merosini tadqiq etish, mazmun-mohiyatini dunyo jamoatchiligiga yetkazishda oʻziga xos platforma vazifasini bajarayotgani birdek qayd etildi. Xususan, anjuman bu yoʻldagi xayrli saʼy-harakatlardan biridir.

Oʻzbekistondagi islohotlarning yorqin natijalaridan mamnunmiz!

Anjuman qatnashchilari Oʻzbekistonda milliy va diniy qadriyatlarni rivojlantirish, tinchlikni mustahkamlash, millatlararo totuvlik va diniy bagʻrikenglikni taʼminlash borasidagi islohotlarning yorqin natijalariga yuksak baho berdi.

Ishtirokchilar Imom Buxoriyning boy ilmiy-maʼnaviy merosini, islom sivilizatsiyasi rivojiga qoʻshgan hissasini chuqur oʻrganish, alloma asarlarini tarjima qilish va sharhlarini oʻrganish asosida tarbiyaviy ahamiyatga doir turkum risolalar chop etish, “Sahih ul-Buxoriy” asarining xorij fondlarida saqlanayotgan qadimiy qoʻlyozmalarni aniqlashni davom ettirish, ularning imkon qadar mukammal toʻldirilgan kataloglarini yaratish va xalqaro koʻrgazmalar tashkil etish borasida hamkorlikni rivojlantirish yuzasidan amaliy takliflarni ilgari surdilar.

Shuningdek, ulugʻ alloma va mutafakkirlarning ilmiy-maʼnaviy merosi asosida yosh avlodni yot va buzgʻunchi gʻoyalar taʼsiridan himoya qilishga qaratilgan xalqaro anjumanlar tashkil qilish, Oʻzbekistonning diniy-maʼrifiy sohani rivojlantirish, mutaassiblik va ekstremizmga qarshi kurashdagi ijobiy tajribasini ommalashtirish ham maqsadga muvofiq ekani taʼkidlandi.

Yuqorida bayon etilganlarni inobatga olib, ishtirokchilar tomonidan kelgusida oʻzaro hamkorlik aloqalarini yanada mustahkamlash, diniy-maʼrifiy mavzularga bagʻishlangan xalqaro anjumanlar oʻtkazish, Imom Buxoriy ilmiy merosini chuqur oʻrganish, mazmun-mohiyatini dunyo jamoatchiligiga yetkazish, alloma qalamiga mansub asarlarning qadimiy qoʻlyozmalarini avaylab-asrash va kelajak avlodga yetkazishga doir tadbirlarni oʻzaro hamkorlikda amalga oshirishga kelishib olindi.

Anjuman nihoyasida “Sahih ul-Buxoriy” asarining  jahon   kutubxonalarida  saqlanayotgan qadimiy va nodir qoʻlyozma nusxalari” mavzuidagi xalqaro konferensiyaning yakuniy bayonoti qabul qilindi.

Soʻz yakunida konferensiyaning yana bir ishtirokchisi, Qozogʻistondagi Abu Hanifa ilmiy-tadqiqot markazi direktori, professor Shamshiddin Karimning anjuman davomida bildirgan quyidagi fikrlarini keltirish oʻrinlidir: “Alloma toʻplagan hadislarda mehr-oqibat, insonparvarlik, ota-ona va kattalarga hurmat, Vatanga muhabbat, halollik va bagʻrikenglik kabi fazilatlar, yosh avlod uchun tarbiyaviy ahamiyatga ega boʻlgan oʻgitlar keng oʻrin olgan. Sirasini aytganda, alloma asarlari bugungi kunga qadar musulmon dunyosi uchun maʼnaviy-axloqiy qoʻllanma boʻlib xizmat qilmoqda va bundan keyin ham shunday boʻlib qoladi”.

Sherzod MAMATOV,
Imom Buxoriy xalqaro ilmiy-tadqiqot markazi matbuot kotibi
Manba: “Yangi Oʻzbekiston” gazetasi
2021-yil 23-iyul, №147(403)
Yangi qonun – g‘oyaviy tahdidlardan himoya

Yangi qonun – g‘oyaviy tahdidlardan himoya

Darhaqiqat, kuni kecha Prezident Sh.Mirziyoyev tomonidan imzolangan “Vijdon erkinligi va diniy tashkilotlar to‘g‘risida”gi O‘zbekiston Respublikasining qonuni yurtimiz diniy-ijtimoiy hayotida ulkan hodisa bo‘ldi.

 

Mazkur qonunda o‘z aksini topgan ijobiy o‘zgarishlar haqida, xususan, undagi birgina jihat – diniy mazmundagi materiallarni olib kirish va tarqatish tartibiga oid moddasining ahamiyati haqida so‘z yuritsak.

Qonunning 10-moddasi, ikkinchi xatboshisida shunday deyiladi: “O‘zbekiston Respublikasi hududida diniy mazmundagi materiallarni tayyorlash, olib kirish va tarqatish jamiyatda konfessiyalararo totuvlik hamda diniy bag‘rikenglik buzilishiga olib keladigan, diniy zo‘ravonlik va boshboshdoqlikka chorlaydigan g‘oyalar hamda qarashlar tarqalishining oldini olish maqsadida dinshunoslik ekspertizasining ijobiy xulosasi olinganidan keyin amalga oshiriladi”.

Bir qaraganda, mazkur modda ayrim xorijiy davlat va huquq tashkilotlari bong urib ta’kidlashdan charchamayotgan diniy materiallarga nisbatan senzura yoki fikr erkinligini cheklashdek ko‘rinishi mumkin. Biroq aslida bunday emas. Moddaning siyoqiga insof nazarini tashlagan har bir aql egasi undan jamiyat va davlat barqarorligiga salbiy ta’sir qiluvchi “konfessiyalararo totuvlik hamda diniy bag‘rikenglik buzilishiga olib keladigan, diniy zo‘ravonlik va boshboshdoqlikka chorlaydigan g‘oyalar hamda qarashlar tarqalishining oldini olish” ko‘zlanganini anglab yetadi. Zero, dinni noto‘g‘ri talqin etish, undan siyosiy va boshqa maqsadlarga yetishda qurol sifatida foydalanish qanday xunuk oqibatlarga olib kelishi bugun hech kimga sir emas. Buni nafaqat Yaqin Sharqdagi nizo o‘choqlari, balki mustaqil O‘zbekistonning tarixida bo‘lib o‘tgan bir qancha ayanchli voqealar misolida ham ko‘rish mumkin. Turli radikal guruhlarning o‘z qabih niyatlarini amalga oshirish yo‘lida odamlar, xususan, yoshlar ongini soxta da’volar bilan zaharlashga qaratilgan urinishlarini aniqlash hamda ularning faoliyatiga chek qo‘yish davlat dinshunoslik ekspertizasi bilan chambarchas bog‘liqdir.

Bundan tashqari, respublika hududida nashr etilayotgan diniy mahsulotlarning sifatli hamda turli bid’at-xurofotlar va ilmiy asosga ega bo‘lmagan to‘qima ma’lumotlardan xoli tarzda aholi qo‘liga yetib borishida dinshunoslik ekspertizasining o‘rni o‘ta muhimdir. Shu bilan birga mazkur amaliyotning saqlab qolinishi diniy mazmundagi materiallar yo‘nalishida faoliyat olib boruvchi tadbirkorlarning manfaatlari himoyasi uchun ham xizmat qiladi. Zotan, davlat dinshunoslik ekspertizasi diniy adabiyotlarga taalluqli mualliflik huquqining muhofaza etilishi, materiallarning kontrafakt usulda tayyorlanishiga chek qo‘yish kabi qonuniy mexanizmlarning ishlashini ham ta’minlab beradi.

Xulosa qilib aytganda, ayrim huquq ekspertlari hamda xorijiy davlat tashkilotlari tomonidan dinshunoslik ekspertizasining senzura sifatida baholanishi hamda ularning mazkur amaliyotni bekor qilishga oid chaqiriqlari hududdagi mavjud va o‘ziga xos diniy-ijtimoiy muhit to‘liq o‘rganilmagan holda o‘rtaga tashlangan bo‘lib, mazkur amaliyotga oid normaning qonuniy kuchda qoldirilishi uzoqni ko‘rib, qabul qilingan oqilona qaror bo‘ldi.

Shunday ekan, diniy-ijtimoiy sohada olib borilayotgan islohotlarning huquqiy asosi bo‘lmish mazkur qonun kelgusida ushbu yo‘nalishda amalga oshiriladigan xayrli ishlarga poydevor bo‘lishi shubhasizdir.

Jahongir JO‘RAYEV,

Imom Moturidiy xalqaro ilmiy-tadqiqot markazi

yetakchi ilmiy xodimi
Manba: "Vatanparvar" gazetasi 2021-yil 23-iyul, 29-soni

OSOYISHTA, FAROVON KUNLAR QADRIGA YETIB…

OSOYISHTA, FAROVON KUNLAR QADRIGA YETIB…

Xalqimiz muborak Qurbon hayiti bayramini bag‘rikenglik, shukronalik, yaratuvchanlik kayfiyati bilan nishonladi. Garchi, butun dunyoni hamon tahlikaga solib turgan koronavirus pandemiyasi tufayli ulug‘ ayyom kunlari karantin talablari asosida o‘tgan bo‘lsa-da, xalqimiz kayfiyati ko‘tarinki, ertangi kunga ishonchi mustahkam. Buning uchun asoslar ham yetarli.

Avvalo, yurtimizda bebaho ne’mat — tinchlik hukmron.

Ko‘rib turibmiz, bugun ayrim davlatlarda nojoiz qurolli to‘qnashuvlar, mohiyatsiz mojarolar avj olmoqda. Bu mamlakatlar fuqarolari o‘q ovozisiz yashashni orzu qiladi, hayotining keyingi lahzasi qanday o‘tishini bilmaydi. Aziz farzandini bag‘riga bosgan onalar Allohdan omonlik so‘rab, iltijo qiladi.

Bozorlarimiz to‘kin-sochin, daromadimiz tayin, ustimiz but, ko‘nglimiz to‘q.

Toshkent. Qo‘yliq bozori. Ba’zi rastalar egasi — sotuvchilar bayram munosabati bilan dam olayotgan bo‘lsa-da, bozor gavjum, savdo avjida. Qandolat mahsulotlari sotayotgan opa “Bugun hayit, keling sizga arzon qilib beraman”, deya xaridorlarning ko‘nglini topadi. Sabzavot sotayotgan yigit esa mijozlarining farzandlariga bittadan xo‘rozqand ulashadi: “Bu sizlarga hayitlik”, deydi.

Bugun daromadimiz ham tayin. Kimki halol mehnat qilib, yaxshi yashashga intilsa, hech to‘siq yo‘q. Tadbirkorlarga davlat ham, idoralar ham xayrixoh. Shu bois, ustimiz but, hayotdan, bugungi va ertangi kunimizdan ko‘nglimiz to‘q. Xullas, hamma xursand, bayram kayfiyati bardavom.

Aziz yurtimizda turli millat va elat vakillari hamjihatlikda, emin-erkin do‘st bo‘lib yashayapmiz. Vijdonimiz ozod, tazyiq va taqiqlardan yiroqmiz.

Diniy va milliy bayramlarimiz zamirida uyg‘un hikmat bor. Bu — bag‘rikenglik va ham-jihatlik tamoyili. Qurbon hayiti kunlari bu jihatlar yanada qo‘r oladi. Shu dorilomon kunlarda yashayotganimiz zamirida ham millatlar va elatlar o‘rtasidagi do‘stona muhit shakllangani, quda-anda bo‘lib, ahil yashayotganimiz falsafasi bor.

Qolaversa, O‘zbekistonda vijdon erkinligi hukmron. Gap o‘zani shu mavzuga o‘tar ekan, bugun yurtdoshlarimizning qonuniy huquq va erkinliklari bilan birga diniy e’tiqodlari va ehtiyojlari ham to‘la ta’minlanayotgani va qonun bilan kafolatlanganini alohida faxr bilan til­ga olamiz. Prezidentimiz tomonidan yaqinda yangi tahrirdagi “Vijdon erkinligi va diniy tashkilotlar to‘g‘risidagi”gi qonunning imzolangani ham fikrimiz tasdig‘idir.

Farzandlarimiz yayrab o‘smoqda.

Bolajon xalqmiz. Ularning kamolini ko‘rish buyuk baxt. Bugun farzandlarimiz uchun ham barcha sharoit muhayyo. Yangi bog‘chalar, maktablar, sport inshootlari qurilmoqda. Bolalarimiz kunu tun ilm, sog‘lom turmush tarzi bilan shug‘ullanishi uchun zamin bor. Ularni mashg‘ulotlarga bexavotir kuzatib, hadiksiz qarshi olamiz.

Bu yil Vatanimiz mustaqilligining 30 yilligini zo‘r xursandchilik bilan nishonlaymiz.

Qurbon hayiti bayramining shunday ulug‘ sana bilan uyg‘un kelishi ham barchamizga shukro­nalik hissini ulashadi.

Shu onlarda keyingi yillarda erishgan yutuqlarimiz va hayotimiz mazmunan go‘zal bo‘lib borayotganidan boshimiz osmonda. 

Bugungi islohotlar xalqimiz turmush sharoitini yaxshilashga qaratilgani bilan ham o‘zgacha mazmun kasb etadi. Ular haqida ko‘p gapirish mumkin. Muhimi, bu islohotlarni har birimiz o‘z hayotimizda sezib, his qilib turibmiz.

Albatta, bu shukuhli hayotning har soniyasi bizni shukr qilishga chorlaydi. O‘z navbatida, diyorimizda Qurbon hayitining fayzli damlari kezib yurgan shu kunlarda ulamolarimizning fikrlari, dil izhorlarini eshitish ham yoqimli.

— So‘nggi yillarda yurtimizda diniy-ma’rifiy sohada juda katta islohotlar amalga oshirilmoqda, — deydi O‘zbekiston musulmonlari idorasi raisining birinchi o‘rinbosari Homidjon Ishmatbekov. — Yangi masjidlar qurilmoqda, eskilari qayta ta’mirlanib, zamonaviy ko‘rinish kasb etyapti. Diniy ta’lim sohasida bir qancha madrasalar, oliy darajadagi ta’lim muassasalari ochilmoqda. Allomalarimizning ilmiy merosi tarjima qilinib, xalqimizga taqdim etilmoqda. Ilmiy markazlar xalqaro miqyosdagi nufuzli anjumanlarni o‘tkazish imkoniga ega. Butun dunyo jamoatchiligi O‘zbekistondagi bu kabi islohotlarni yuqori baholayotganiga shohid bo‘lib turibmiz.

Prezidentimizning O‘zbekiston xalqiga yo‘llagan Qurbon hayiti tabrigi yurtdoshlarimiz uchun haqiqiy bayram tuhfasi bo‘ldi. Tabrikdan ruhlangan xalqimiz keyingi yillarda amalga oshirilayotgan islohotlarimiz bardavom va barakali bo‘lishini tilab, duolar qilmoqda.

Alloh xalqimizga Qurbon hayiti bayramini muborak qilsin. Butun dunyoga kelib turgan koronavirus kasalligini shu kunlarning sharofati ila tezda daf qilishni O‘zi nasib aylasin.

— Davlatimiz rahbarining xalqimizga yo‘llagan bayram tabrigi barchamizni xursand qildi, — deydi Imom Moturidiy xalqaro ilmiy-tadqiqot markazi direktori Davron Maxsudov. — Prezidentimiz o‘z tabrigida mo‘min-musulmonlarni ulug‘ ayyom bilan qutlab, yurtimizda keyingi yillarda amalga oshirilayotgan islohotlar, yangilanishlarga alohida urg‘u berdi. Jumladan, vijdon erkinligi va diniy tashkilotlar faoliyatiga doir qonunning yangi tahrirda qabul qilinishi turli diniy e’tiqoddagi aholi uchun keng imkoniyatlar eshigini ochgani bilan ahamiyatli bo‘ldi. Ayniqsa, islom dinini, ajdodlarimiz qoldirgan moʻtabar manbalarni ilmiy asosda o‘rganish uchun sharoitlar yaratilgani e’tiborlidir. Atrofimizga qarasak, qancha-qancha yangilanishlar, o‘zgarishlar bo‘lmoqda. Bugun shu kunlarning qadriga yetish, shukronalik hissi bilan yashash Allohga ham xush keluvchi amallardan sanaladi.

Darhaqiqat, bugungi ulug‘ ayyom kunlari shukuhi haqida gapirar ekanmiz, allomalarimizning “Hayit kunlari shodlikni izhor qilish dinning shiorlaridandir”, degan gapini yodga olish o‘rinli. Shu bois, Qurbon hayiti kunlarida quvonchimizni, saxovatimizni har qachongidan ko‘ra, ko‘proq namoyon qilishimiz lozim.

Ulug‘bek ASROROV,
“Yangi O‘zbekiston” muxbiri,
Manba: “Yangi O‘zbekiston” gazetasi
2021-yil 23-iyul, №147(403)

Vijdon erkinligining o‘ziga xos xususiyatlari

Vijdon erkinligining o‘ziga xos xususiyatlari

 

Vijdon va din erkinligini ta’minlash O‘zbekiston Respublikasi olib borayotgan siyosatning ustuvor vazifalaridan sanaladi. Shu bois so‘nggi yillarda respublikamizda fuqarolarning vijdon erkinligini ta’minlashga qaratilgan keng ko‘lamli demokratik islohotlar olib borilmoqda. Bu borada vijdon erkinligining huquqiy asoslarini mustahkamlash, qonunchilikni inson huquqlariga oid xalqaro andazalar asosida takomillashtirish ham respublikamizda amalga oshirilayotgan islohotlarning eng dolzarb vazifalaridan deb qaralmoqda. Xususan, 2021-yil 5-iyulda O‘zbekiston Respublikasi Prezidenti Oliy Majlis tomonidan taqdim etilgan “Vijdon erkinligi va diniy tashkilotlar to‘g‘risida”gi qonunni imzoladi.

Mazkur qonun AQSh, Yevropa Ittifoqi va jahonning ilg‘or davlatlarining inson huquqlari bo‘yicha markazlari hamda xalqaro tashkilotlari mutaxassislarining taklif va tavsiyalarini o‘rgangan holda ishlab chiqildi. Yangi qonunning oldingi qonundan asosiy farqli jihatlari shundaki, bu hujjatda fuqarolarning vijdon erkinligi kafolatlari kuchaytirildi, har bir inson xohlagan dinga e’tiqod qilish yoki hech qaysi dinga e’tiqod qilmaslik huquqini ta’minlashning yangi mexanizmlari joriy etildi, shuningdek, davlatning din ishlari bo‘yicha siyosati takomillashtirildi.

Bundan tashqari, “Vijdon erkinligi va diniy tashkilotlar to‘g‘risida”gi qonunda diniy sohadagi qonun hujjatlarida qo‘llaniladigan asosiy tushunchalarga ta’rif berildi. Bu orqali oldingi qonunda mavjud bo‘lgan mavhum tushunchalardan voz kechildi. Shuningdek, diniy tashkilotlarning huquq va majburiyatlari, ular ta’minlanishining kafolatlari, shu jumladan, yuqori turuvchi organ yoki sudga mansabdor shaxslarning diniy tashkilotlarning huquq va erkinliklarini buzuvchi qonunga xilof harakatlari (harakatsizligi) bo‘yicha ular sudga murojaat qilganda, davlat bojini to‘lashdan ozod etilishi mustahkamlab qo‘yildi. Bu esa diniy tashkilot va davlat organlari o‘rtasidagi munosabatlar shaffofligiga xizmat qiladi. O‘z navbatida, diniy tashkilotlarga nisbatan kuzatilishi mumkin bo‘lgan turli noqonuniy xatti-harakatlarning oldini oladi.

Ilgari diniy tashkilot rahbarligiga nomzod xorijiy davlat fuqarosi bo‘lsa, bu shaxsning rahbar bo‘lish imkoniyati cheklanardi. Ya’ni oldingi qonunning 8-moddasida “Diniy tashkilotlar rahbarligiga O‘zbekiston Respublikasining fuqarosi bo‘lmagan shaxslarning nomzodi O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita bilan kelishib olinadi” degan jumla asosida muayyan cheklovlar o‘rnatilgandi. Bu esa ba’zi diniy tashkilot vakillariga muayyan qiyinchiliklarni keltirib chiqarardi. Yangi qonunda bu kabi holatlarning oldini olish maqsadida diniy tashkilot rahbarligiga ko‘rilayotgan chet ellik fuqaro nomzodini Din ishlari bo‘yicha qo‘mita bilan kelishish hamda bu shaxsning O‘zbekiston Respublikasi fuqarosi bo‘lishi to‘g‘risidagi talablar bekor qilindi.

Diniy tashkilotlarni tuzish va ro‘yxatdan o‘tkazish bilan bog‘liq ma’muriy buyruqbozlik holatlarining oldini olish hamda fuqarolarga qulayliklar yaratish maqsadida diniy tashkilotni tuzish va ro‘yxatga olishning elektron tizimiga o‘tkazish tartibi o‘rnatildi. O‘z navbatida, bu amaliyot diniy tashkilotlarni ro‘yxatdan o‘tkazish jarayonining tezlashuviga xizmat qiladi. Ilgari ro‘yxatga olish organi tomonidan diniy tashkilotni ro‘yxatdan o‘tkazish uchun hujjatlarni ko‘rib chiqish muddati uch oy deb belgilangan edi. Yangi qonunda bu muddat 3 barobar qisqartirildi va bir oylik muddatda diniy tashkilotni ro‘yxatdan o‘tkazish uchun hujjatlar ko‘rib chiqilishi mustahkamlandi. Shu bilan birga, diniy tashkilotni ro‘yxatdan o‘tkazishni rad etish asoslarining to‘liq ro‘yxati ko‘rsatib o‘tildi. Bu esa ro‘yxatdan o‘tkazish bilan bog‘liq amaliyotning shaffofligi yanada ortishiga sabab bo‘ladi.

Vazirlar Mahkamasining 2018-yil 31-mayda qabul qilingan “O‘zbekiston Respublikasida diniy tashkilotlarni davlat ro‘yxatidan o‘tkazish, qayta ro‘yxatdan o‘tkazish va tugatish tartibi to‘g‘risidagi nizomni tasdiqlash haqida”gi 409-sonli qaror talablarida diniy tashkilotlarni tuzish uchun fuqarolarning o‘zini o‘zi boshqarish organlari tomonidan beriladigan rozilik xati ham zaruriy talab sifatida belgilangan edi. Bu esa diniy tashkilot tuzish bilan bog‘liq jarayonlarning murakkablashuviga sabab bo‘lardi. Yangi qonunchilikda diniy tashkilotlarni tuzishni soddalashtirish maqsadida ro‘yxatdan o‘tish jarayonida mahalla ishtiroki bekor qilindi.

Shuningdek, 1998-yilda qabul qilingan qonunda diniy tashkilot tuzish uchun tashabbuskor shaxslar soni eng kamida 100 nafar bo‘lishi qoida tariqasida o‘rnatilgandi. Endilikda, mahalliy diniy tashkilotni ro‘yxatdan o‘tkazish uchun talab qilinadigan shaxslar soni 100 nafardan 50 nafargacha qisqartirildi. Bu holat ham qonunning liberalligi yanada ortishiga xizmat qilgan.

Umuman olganda, qabul qilingan qonun inson huquqlari bo‘yicha xalqaro standartlar bilan kafolatlangan diniy sohada umume’tirof etilgan huquq va erkinliklarni qamrab olgan holda yurtimiz aholisining mentaliteti, o‘ziga xos jihatlari va din erkinligi bilan bog‘liq orzu-istaklarini o‘zida mujassam etgan.

Shukrulloh JO‘RAYEV,

Imom Moturidiy xalqaro ilmiy-tadqiqot

markazi bosh ilmiy xodimi
Manba: "Vatanparvar" gazetasi 2021-yil 23-iyul, 29-soni